Agsagsaganan dagiti atleta manipud kadagiti nagduduma a paset ti pagilian para iti umadanin a Palarong Pambansa 2025 a maangay sadiay Ilocos Norte inton Mayo baente kwatro agingga Hunyo a dos iti agdama a tawen.
Sigun kenni Ilocos Norte Governor Matthew Joseph Manotoc, nakasaganan ti nasao a probinsya para iti panangipaayda iti memorable experience kadagiti agarup 15-K a participants a pakairamanan dagiti atleta, coaches ken daduma pay.
Kaadoan kadagiti competition venues ken billeting schools ket nakasagana metten.
Maipalagip a ti nakaangayan ti Palarong pambansa idi napalabas a tawen ket sadiay Cebu City no sadino ti nangabak iti nasao a pasalip ket ti National Capital Region a nakaala iti 98 a gold medal, 66 silver medal ken 74 bronze medal.
Dagiti karaman iti Top five ket ti CALABARZON, Western Visayas, Davao ken Central Visayas.
Naituding met a ti aghost iti Palarong Pambansa inton tawen 2026 ket ti Agusan del Sur.
