Manarimaan ti imbestigasyon dagiti otoridad iti napasamak a panagcrash ti medevac plane wenno air ambulance sadiay Philadelphia, Pennsylvania a nakaluganan ti uppat a crew members, maysa a pediatric medical patient ken maysa patient escort.
Maibasar iti report, ti eroplano ket nagtaud manipud Northeast Philadelphia Airport ken paturong iti Springfield-Branson National Airport sadiay Missouri idi kellaat a nagcrash daytoy iti asideg ti Roosevelt Mall no sadino ado nga indibidual ti nadangran.
Iti inisyal nga imbestigasyon, maysa a balay ken nagduduma a lugan ti nauram.
Kabayatanna, inyebkas ni US President Donald Trump ti panagladingitna nangruna ket ado nga inosente a biyag ti napukaw.
Iti agdama, awan pay ti nakumpirmar a survivor manipud iti eroplano.
Maipalagip nga itay napalabas ket napasamak ti panagbinangga ti American Airlines Jet ken ti US Army Blach Hawk helicopter sadiay Washington, DC a nakatayan ti 67 a katao, ti maibilbilang a “deadliest airplane crash” kalpasan ti napasamak idi tawen 2009 sadiay Estados Unidos.
