Manarimaan ti imbestigasyon dagiti otoridad iti dua a napasamak nga structural fire iti siudad ti Baguio itay laeng agsapa.
Immuna a napasamak ti uram idiay Kennon Road, Montecillo, Camp 7, Baguio City pasado ala una itay parbangon.
Maibasar iti report, bayat nga agpatpatrolya dagiti otoridad nakakita dagitoy ti asok nga agtataud ti maysa nga ice plant.
Incheck ngarud dagitoy ket ditoy a naduktalanda a maur-uram daytoy ngem awan iti tao sadiay.
Gapu iti dayta, nagtitinulong dagitoy tapno masebseban rason a naideklara a dagus daytoy a fire out.
Adda met dagiti kameng ti Bureau of Fire Protection para iti kanayonan nga imbestigasyon.
Kabayatanna, napasamak met ti maysa manen nga structural fire idiay Engineers Hill itay metlaeng agsapa.
Sigun kadagiti kaaruba ken witness, maatap a ti rason ti uram ket gapu iti naliwayan a nakacharge a selpon.
Awan pay met ti statement manipud iti nagresponde a kameng ti Bureau of Fire Protection.
Iti baet dayta, awan ti nadangran kadagiti nasao nga uram.//Bombo Noveh Organo
