BAGUIO CITY – Imimbestigaran paylaeng ti Bontoc Municipal Police Station ti panakatay ti maysa a pulis a nasarakan ti bangkayna iti sirok ti Chico Jumbo Bridge sadiay Bontoc, Mountain Province idi Sabado.
Nabigbig ti nasao a pulis a ni SPO4 Joseph Anganayon Aspilan, 49-anyos ken nakadestino iti Natonin Municipal Police Station.
Iti panakiuman ti Bombo Radyo kenni PCI Jimmy Macwes, chief of police ti Bontoc PNP, kinunana a manarimaan ti panangalada iti salaysay manipud iti pamilya ken kadagiti makaam-ammo iti nasao a pulis bayat ti panakabantay ti bangkay daytoy.
Dinakamatna a sakbay ti insidente ket immatendar ni SPO4 Aspilan iti taripnong nga impatungpal ti Mountain Province Police Office idi October 5 sakbay a binisitana ti pamilyana sadiay Poblacion, Bontoc.
Naamuanda iti asawa ni SPO4 Aspilan a malem ti October 7 idi nagdesisyon daytoy nga agsubli iti Natonin PNP ken nagturong daytoy iti Chico Jumbo Bridge tapnu aguray iti lugan.
Nupay kasta, kalpasan ti sumagmamano nga oras ket nasarakan laengen ti bangkay ti pulis iti sirok ti nasao a rangtay.
Iti post mortem examination, naduktalan a nagsagrap ti pulis iti sugat iti kanigid a takiag ken iti ulo dagitoy.
Kitkitaen pay ti Bontoc PNP no adda ti posibilidad nga aksidente ti napasamak.
