![](https://img.bomboradyo.com/baguio/2021/04/uram-bakakeng-central.jpg)
BAGUIO CITY – Agtultuloy ti imbestigasyon ti Bureau of Fire Protection (BFP) – Baguio iti panakauram ti maysa a balay sadiay Purok 8, Bakakeng Central, Baguio City idi kalman.
Nauram ti uppat a kadsaaran a balay a nagresulta iti panaka-apektar ti lima a pamilya.
Nabigbig met ti agtagikua iti nasao a balay a ni Marcos Atayan.
Sigun kenni SFO1 Jose Dacwag, imbestigador ti BFB-Baguio, nangrugi ti uram iti ala-una ti malem ken naideklara ti fire out iti alas-dos kinse.
Kinunana a naaramid ti balay babaen iti semento ken light materials a rason iti dagus a panaka-uram ti entero a balay.
Dinakamatna a nagrugi ti apoy iti maikadua a kadsaaran ti balay ngem saanda pay maitudo ti nangitunda iti daytoy ken ti pakabuklan a danyos nga imbati ti uram.
Kabayatanna, adda metten dagiti personnel ti DSWD a nagturong ken nakipatang kadagiti pamilya a napukawan ti pagtaaengan para iti panakaipaay ti kaskenan a tulong kadagitoy.