BAGUIO CITY – Agtultuloy ti imbistigasyon ti Bureau of Fire Protection Baguio iti nangitundati panakauram ti maysa a balay sadiay Purok 9, Verdant Hill Villas Subdivision, Dontogan, Baguio City idi agsapa ti May 23.
Maibasar iti report, nabigbig ti agtagikua iti balay a ni John Angiwan Amtalao, 31 anyos, awanan asawa ken maysa a mannursuro.
Sigun iti ina daytoy a ni Angelina Amtalao, alas diyes biente iti agsapa idi kalman nga adda naangotna a mapupuuran iti maikadwa a kadsaaran ti balayda.
Gapu iti daytoy, binilin na ti anak na a sukimaten ti maikadwa a kadsaaran ti balayda ken ditoy a naimatanganda ti napuskol nga asok.
Babaen iti panagtinulong dagiti kameng ti Tuba Fire Station ken BFP Baguio, nasebseban ti apoy ken naideklada a fire out idi 10:58 AM.
Awan met iti nadangran iti nasao nga insidente.
Iti agdama ket saan pay a naamoan ti danyos iti napasamak nga uram.
