Inserra dagiti otoridad ti Israel ti kangrunaan nga international airport gaputa napaayda a nanglapped kadagiti missile a naipatayab manipod Yemen.
Sigun iti Israel, napeggad ti pagilianda gapu iti agtultuloy a panangraut ti rebelde a grupo ti Houthi iti laksid ti agtultuloy a kampania militar ti Estados Unidos.
Inaklon met ti rebelde a grupo ti Houthi idiay Yemen a responsableda iti panangraut, ken inlawlawagda nga inaramidda ti nasao a banag kas panangibaga a saanda nga umannamong iti crime of genocide nga ar-aramiden ti Israel kontra kadagiti tattao idiay Gaza.
Ti panangraut iti international airport ti Israel ti maikonkonsidera a kaunaan a panagballigi a puntiria ti nasaoa a grupo.
Kabayatanna, nagballaag ni Israeli Defense Minister Israel Katz iti nasao a grupo a mabalin a nakaro ti panangibalesda.
