Inwaragawag ti Bagong Alyansang Maka bayan (Bayan) nga isagsaganada ti impeachment complaint kontra kenni Vice President Sara Duterte.
Sigun kenni Bayan chairperson Teddy Casiño, kasapulan a nakasagana ti reklamo intun Nobiembre apaman nga agsubli dagiti session iti Kongreso.
Nupay kasta, saan a nangipaay ti nasao a grupo iti kanayunan nga impormasion iti basaran ti impeachment complaints ngem inlaw-lawagda a saan a paset daytoy iti panagpolitika.
Maipalagip nga immunan a kinuna ni Vice President Duterte nga adda dagiti panagregget iti Kamara a mangikkat kenkuana iti puesto daytoy.
Malaksid iti dayta, inakusaran na ni House Deputy Minority Leader ken ACT Teachers party-list Representative France Castro a daytoy ti adda iti likudan ti maipapan iti impeachment kontra kenkuana.
Nupay kasta, pinaglibakan ni Castro ti aligasion ni Vice President Duterte.
Kabayatanna, kinuna met ni House Speaker Martin Romualdez nga awan ti nangeganda a maipapan iti plano a mangikkat kenni Duterte kas Vice President iti pagilian a Pilipinas.
