BAGUIO CITY – Irtengan pay ti La Trinidad Municipal Police Station ti implementasion ti Tobacco Control Ordinance iti masakupan dagitoy ita a tawen.
Namnamaen ti La Trinidad PNP a maksayan ti bilang dagiti aglabsing iti nasao nga ordinansa kasaruno ti pannakaipatungpal ti education campaign para iti daytoy.
Maibasar iti listaan, dumanon iti 216 dagiti indibidual a naglabsing iti Tobacco Control Ordinance ti munisipio idi napalabas a 2017.
Nailista ti kangatuan a bilang ti panaglabsing iti bulan ti Marso a dumanon iti 66 ken sumaruno ti Setyembre a dumanon iti 59.
Sigun iti pulisya, kadawyan a pakapaspasamakan ti panaglabsing iti nasao nga ordinansa iti deppaar ti La Trinidad Vegetable Trading Post, Strawberry Farm ken iti asideg ti Strawberry Valley Hotel.
Nakalanad iti ordinansa a mamulta iti P1,500 dagiti aglabsing iti umuna a gundaway, P2,000 iti maikadua ken P2,500 iti maikatlo a gundaway.
