Impetteng ni Wilbert Manas, Teacher III ken research coordinator sadiay Guinaoang National High School a ti impluwensya dagiti barkada ti kangrunaan a rason iti panagaramat iti vape dagiti estudyante iti maysa a pagadalan sadiay Mankayan, Benguet.
Sigun kenkuana, kas maibasar iti panagadal dagitoy saan a kayat dagiti estudyante a maibati wenno ma-out of place gaputa kaadduan kadagiti barkada dagitoy ket agar-aramat iti vape.
Kinunana nga ipagarup dagiti sumagmamano nga estudyante a nasaysayaat iti salun-at ti panagvape no idilig iti traditional a sigarilyo.
Nupay kasta, napaneknekan kadagiti dadduma a panagadal a narisrisgo ti epekto ti vapes agsipud ta synthetic ti juice daytoy no idilig iti tabaka a natural.
Impeksana a saan nga agsardeng dagiti estudyante nga agaramat iti vape gaputa accesible daytoy ken nalaka.
Gapu iti dayta, inaldaw dagitoy nga agkumpiskar ngem adu latta dagiti agar-aramat.
