Saan nga agbalbalin a pakaseknan wenno pangta kadagiti sumagmamano a flower vendors iti Baguio City dagiti maim-import a sabong a mailaklako iti merkado publiko.
Iti panakiuman ti Bombo Radyo kenni Antonio Leon, presidente iti Flower Section iti Baguio City Public Market, adu latta dagiti customer nga agsarsarak kadagiti Rosas a mapapataud iti Benguet ken pasaray agkurkurang pay nu daduma ti suplay iti daytoy.
Sigun kenni Leon, adu dagiti agang-angkat ti mailako kadagiti kabangibang a lugar nangruna sadiay Manila gapu ta nu daduma ket adu metlaeng ti idiayen a gumatang tapno saandan nga agbiahe paturong iti Baguio City ken iti Benguet.
Kagiddan dayta, maisingsingasing ti nasapsapa a panagorder dagiti interesado tapno masiguradoda a nalaklaka ken napinpintas dagiti sabong a maalada.//Bombo Rob Dominguez
