Sumangsango ita iti kaso a panaglabsing iti Expanded Anti-Trafficking in Persons Act of 2022 ti maysa nga ina gapu iti panangilakona iti ‘explicit photos’ iti dua a menor de edad nga annakna.
Dagitoy ket residente idiay Sta. Rosa, Olango Island, Lapu-Lapu City, Cebu
Naarestar ti ina a saanen nainaganan bayat ti impatungpal nga entrapment ken rescue operation dagiti kameng iti Lapu-Lapu City Police, ken ti Women and Children Protection Center Visayas Field Unit.
Dagiti ubbing ket agtawen laeng iti 13 ken 15 nga iti agdama ket addan iti kustodiya iti Department of Social Welfare and Development Field Office-Center for Women and Children iti Central Visayas.
Sigun iti report, sipud pay nadiskubre dagiti otoridad idi July 2023 ti maatap a panangilako ti ina iti ‘explicit photo’ dagiti annakna kasukat iti P2000 tunggal ladawan, inmonitorda daytoyen.
Nupay kasta, kinuna dagiti otoridad nga indepensa ti suspect nga inaramidna ti nasao a banag gapu iti pinansyal a pagkasapulan daytoy.
