Inikkat ti Social media platform a Facebook dagiti sangapulo ket dua nga account a maar-aramat iti illegal adoption ken onling selling dagiti maladaga.
Sigun kenni Social Welfare Secretary Rex Gatchalian, naaramid daytoy nga aksyon kalpasan a kiniddaw ni National Authority for Child Care (NACC) Executive Director Janella Estrada.
Manarimaan metten ti koordinasyon dagiti maseknan nga opisina iti Meta, ti parent company ti Facebook tapno maipasigurado a saan nga umado ti pages wenno account a maar-aramat iti iligal nga aktibidad.
Immunan a naiwaragawag nga adda ti 20 agingga 30 a Facebook pages idi pay a napalabas a tawen a bambantayan ti Department of Social Welfare and Development ken National Authority for Child Care a maar-aramat iti panangilako ken panang-adoptar kadagiti maladaga.
Maipalagip nga idi laeng Mayo 15 ket adda ti naispal a walo a bulanna a maladaga a lalaki nga ilaklako mismo ti inana ken ti agent babaen iti Facebook marketplace iti gatad a P50,000 agingga P90,000 idiay Dasmarinas, Cavite last May 15.
Inyunay-unay ti gobyerno a nasken a dumalan iti pagannurotan ti DSWD ti child adoption.
Sumango iti kaso a panaglabsing iti Republic Act 9208 – Anti-Trafficking in Persons Act of 2003 – ken Republic Act 7610, wenno ti Special Protection of Children Against Abuse, Exploitation and Discrimination Act dagiti aglabsing iti daytoy.
