BAGUIO CITY – Im-imbestigaran ita ti pulisya ti motibo ken pakabigbigan ti lalaki a nangpaltog iti agina iti uneg ti maysa a panganan sadiay La Trinidad, Benguet idi rabii kalman.
Pimmusay ti ina a nabigbig a ni Lorna Simon Aquino, 56-anyos, real state agent, tubo ti Bacnotan, La Union bayat a nadangran ti anakna a ni Karen Aquino Santiago, 27-anyos, agpada dagitoy a residente ti Pico, La Trinidad, Benguet.
Sigun kenni PMaj. Roldan Cabatan, hepe ti La Trinidad Municipal Police Station, adda ti agina iti uneg ti pangananda idi simrek sadiay ti saan pay a nabigbig a lalaki ken killaat a pinaltoganna ni Lorna Aquino.
Ginandat ti anak a ni Karen Santiago a lapdan ti suspek ngem inarakop ti suspek ti likudanna sakbay nga imputok ti suspek ti paltog a nagresulta iti panakasugat ti agong ken pingpingna.
Dagus a naglibas ti suspek babaen iti getaway vehicle a silver a Toyota Wigo nga awanan plaka.
Naitaray ti agina iti ospital ngem naideklara a dead on arrival ni Lorna Aquino bayat a nakaruar a dagus ti anak kalpasan a nataming ti dunorna.
Iti agdama, ad-adalen ti pulisya dagiti video footages kadagiti CCTV cameras a naimuntar iti asideg ti nakapasamakan ti krimen para iti posible a panakabigbig ti suspek.
