Nagpalagip dagiti eksperto iti salun-at seknan iti kinapateg iti inaldaw a nasalun-at nga estilo ti panagbiag tapno maliklikan ti Chronic Kidney Disease (CKD), maysa a kasasaad nga agtultuloy nga umad-adu iti pagilian.
Sigun kenni dietitian-nutritionist ken professor Dr. Imelda Degay, napateg ti umno a panaginum iti danum, panagkessay iti naapgad a makan, ken balanse a taraon tapno mataginayon ti umno a panagandar ti kidney.
Irekrekomendar iti nasao nga opisial ti saan a bummaba iti dua a litro iti danum tunggal aldaw a mainum.
Innayonna pay a mabalin nga agkasapulan iti nangatngato a kinaadu iti danum dagiti umin-inum iti maintenance iti agas wenno maipaspasidong kadagiti panangagas a kas iti chemotherapy, depende iti ibaga iti doktor, bayat a rumbeng metlaeng a nayunan ti panaginum iti danum nangruna dagiti agnanaed iti nabara a lugar.
Inlawlawag metlaeng ni Degay ti panangliklik iti nalabes nga apgad ken pannangan iti nangato iti sodium, gaputa mangnayon daytoy iti peggad iti pannakadadael iti kidney.
Sigun kadagiti eksperto, napateg ti nasapa a panangaywan iti salun-at gaputa kadawyan a saanen a maisubli iti sigud ti nadadael a kidney nu daytoy ket nakaron.
Agtultuloy ti panawagan iti publiko nga agpacheck-up ken pagtalinaeden iti nasalun-at a panagbiag tapno maliklikan ti Chronic Kidney Disease (CKD).
