BAGUIO CITY – Ibalbalakad manen ti Provincial Social Welfare and Development Office ti Benguet ti nainget a panangbantay dagiti nagganak kadagiti annakda a babae kasaruo ti panakailista ti 27 a kaso ti panagrames iti probinsia manipud Enero agingga Hulyo ti agdama a tawen.
Iti panakiuman ti Bombo Radyo Baguio, kinuna ni Juana Bannawe, dadaulo ti nasao nga opisina a nailista dagiti nasao a kaso ti panagrames sadiay Atok, Buguias, Kapangan, Mankayan, La Trinidad, Kibungan, Itogon, Tublay ken Itogon.
Kinunana a kaaduan a kaso ti panagrames ket ‘incest rape’ wenno ti suspek ket kasinsin wenno kabagian a mismo ti biktima.
Innayonna a kaaduan kadagiti biktima ket agtawen ti innem agingga sangapulo ket innem 6 agingga iti 16.
Inyunay-unay ni Bannawe kadagiti nagannak ti saanda a basta panangitalek kadagiti annakda kadagiti kabagyanda nangruna ta maysa daytoy iti rason no apay a mapaspasamak ti nasao a krimen.
Nupay kasta, kinunna ni Bannawe nga agtultuloy latta ti panangitedda ti counselling kadagiti nagganak iti probinsya para iti panagbalin dagitoy a naridam iti baet a sumagmamano kadagiti aktibidadda ket nakanselar gapu iti agdama a pandemya.
Kidkiddawenna pay ti dagus a panagkamang dagiti nagannak kadagiti otoridad no mabiktima dagiti annakda iti panagrames tapnu dagus a maaksionan tapnu saanen a maulit pay gaputa dakkel ti epekto ti insidente kadagiti ubbing a biktima.
