Maipakpakaammo kadagiti indibidual nga addaan ti human immunodeficiency virus (HIV) a mabalinda nga usaren ti HIV/AIDS treatment package ti Philippine Health Insurance Corp. (PhilHealth).
Sigun iti PhilHealth, maipaayan dagitoy ti tinawen a benepisio a dumanon iti P58,500.
Saklawen daytoy ti antiretroviral therapy ken pannakagun-od iti amin a serbisio a kasapulan para iti epektibo nga HIV management.
Mabalin a maala dagiti pasiente ti package babaen kadagiti 234 accredited HIV treatment hubs iti intero a pagilian.
Kabayatanna, idagdagadag ni PhilHealth president and CEO Erwin Mercado kadagiti parentes a suportaranda ken ipariknada iti anakda nga addaan iti HIV a saan dagitoy nga agmaymaysa.
Kasaruno daytoy iti dumakdakkel a kaso ti nasao a sakit, nangruna kadagiti agtutubo.
Maipalagip nga impakaammo dagiti otoridad a dumanon iti 5,593 dagiti nailista a kaso ti HIV, manipud July agingga September iti agdama a tawen.
