BAGUIO CITY – Rugianen ti Social Security System (SSS) ti information campaign daytoy seknan kadagiti programa ken baro nga inisyatibo ditoy rehion Cordillera.
Tarigagay ti Regional SULIT Conference a mapabileg ti interpersonal communication iti nagbaetan ti SSS ken dagiti stakeholders babaen iti conference idi malem kalman iti maysa a hotel ditoy siudad ti Baguio.
Naipalawag kadagiti Overseas Filipino Workers, kadagiti self-employed, kadagiti empleyado ti gobyerno ken kadagiti lokal a gobyerno dagiti programa ken benipisyo a pagnumnumaran dagiti miembro ti SSS ken ti tunggal sektor iti kagimongan.
Nagserbi pay daytoy a panakaiyusuat ti baro a kampanya ti SSS nga addaan iti tema ti ahensia nga: Kontribusyon Sulit na Sulit.
Kabayatanna, isayangkat dagiti nangangato nga opisyales ti SSS ti ‘Future Members’ Forum’ ita nga aldaw iti maysa nga unibersidad ditoy siudad para met kadagiti estudyante iti kolehio, dagiti trainees ti TESDA ken pribado a Technical – Vocational Institutions.
Maisayangkat pay ti media-hopping kabayatan ti regional information caravan tapnu mapatibker ti panaka-ammo ti publiko seknan kadagiti programa ken serbisyo nga ipapaay ti SSS kadagiti miembro daytoy.
