Nagsagrap iti minor injuries dagiti innem a pasaheros iti napasamak a vehicular traffic accident sadiay Badiwan Bridge partikular sadiay Marcos Highway, Sitio Badiwan, Barangay Poblacion, Tuba, Benguet iti 6:am idi May 23, 2025.
Dagiti nadangran nga indibidual ket agpapada a pasaheros ti bus company a victory liner.
Kadagiti biktima, dua kadagitoy ket agtawen iti 24-anyos, bayat a ti maysa ket agtawen met iti 26-anyos, ken dagiti dua a nataengan.
Kabayatanna, awan met ti nadangran iti maysa a bus company a florida karaman metlaeng iti nasao nga aksidente.
Iti imbestigasyon nga insayangkat ti pulisya, dagiti dua a bus company ket agpada a paturong iti siudad ti Baguio idi nagfull-stop ti maris pink a bus bayat nga ur-urayenna nga agibaba iti pasahero ti sarsarunuen dagitoy a lugan.
Gapu iti panagfull-stop ti immuna a bus nadungpar daytoy ti labaga a bus iti likodanna.
Nangitunda daytoy iti pannakaiduron ti pink a bus iti sangapulo a metro manipud iti nakabanggaanna.
Sigun met iti driver ti red bus inkagumaanna pay nga imbaddek ti prenona ngem saanen a nalapdan a nangitunda iti aksidente.
Naipayaan metten ti citation ticket ti driver ti red bus gapu iti reckless driving.
Kabayatanna, iti pannakiuman ti Bombo Radyo kada Marlon Fernandez- field partner victory liner bus company ken Dominador Urbanozo- operational supervisor ti Florida bus company, kinunada a ti nasao a bus company ket awan ti problemaendan gapu ta settled daytoyen ken naareglon.
Iti pannakiuman Bombo Radyo kenni Urbanozo iti pink bus, kinunana a saan dagitoyen nga agpinabasol gapu ta aksidente ket aksidente ngem impeksana a sakbayna a palubusan dagiti driversda ket agpalpalagip dagitoy iti panagannad ken agkararag a kanayon.
Sigun met kenni Fernandez ti red bus, sagutda amin ti mabayadan ti pannakarepair ti nadungpar dagitoy a bus.
Malaksid iti dayta ket sagutda metlaeng ti bayadan dagiti innem a pasaheros a nadangran iti panagpaagasda agingga a makaruar dagitoy.
Innayonna pay nga uray dagiti nakaawiden a pasaheros dagitoy no makariknada iti sakit ket agpacheck-upda no sadino ket sagutda ti bayadan dagitoy.
Impeksana met a no maipapan iti driver dagitoy a karaman iti aksidente ket dumalan daytoy ti legal a proseso.
Nupay kasta, possible a mapilaan daytoy iti kaso a Reckless Imprudence Resulting in Damage to Property and multiple physical injuries.//Bombo Noveh Organo
