Nakailista ti City Health Services Office (CHSO) iti innem a ribo walo gasut ken duapulo ket dua a kaso ti dengue manipod Setiembre a singko iti agdama a tawen.
Daytoy ket kas maibasar iti naala nga impormasion babaen ti panagregget ti nasao nga ahensia nga idadauloan ni Acting City Health Officer Dr. Celia Flor Brillantes.
Iti nasao a bilang, sangapulo ket lima ti pimmusay pakairamanan ti uppat nga ubing nga agtawen ti maysa, uppat, innem ken siam.
Kaaduan kadagiti pimmusay ket agtawen ti tallo pulo ket maysa agingga lima pulo a tawen.
Ad-adu ti lallaki a pimmusay ngem ti babbai ken kaaduan a pimmusay ket napasamak idi Hunio agingga Agosto.
Dua ti pimmusay idiay Irisian ken Camp 7, Baguio City bayat a dagiti dadduma ket iti sabali a lugar.
Ti kangrunaan a barangay a nakairekord ti kangatuan a kaso ket ti Irisan, Bakakeng Central, Asin Road, Pacdal, Sto. Tomas Proper, Camp 7, Gibraltar, Loakan Proper, Bakakeng Norte ken Pinget.
Sigun kenni Baguio City Mayor Benjamin Magalong, numan pay bimmaba ti mailislista a kaso, rumbeng nga agtultuloy latta a naridam ti publiko ken obserbaran ti panangipatungpal ti “search and destroy operations” tapno mapaksiat dagiti lamok nangruna iti pag-itlogan dagitoy.
Malaksid iti dayta, maiyunay-unay pay iti publiko a dagos nga agturong iti pag-agasan iti kanito a mapasaran iti sintomas ti dengue tapno maliklikan ti ipupusay.
