MARYLAND, USA – Mapapati a pimmusayen ti innem nga indibidual nga agtrabtrabaho iti Francis Key Scott Bridge idiay Baltimore, Maryland, USA kalpasan a natnag dagitoy iti danum idi nagcollapse ti nasao a rangtay.
Iti interview ti Bombo Radyo kenni Teresita Totanes, Bombo International News Correspondent – Maryland, USA, dua ti nabirukan ken naispal a kakadwa dagitoy.
Sigun kenkuana, dukduktalen paylaeng dagiti otoridad ti bilang dagiti lugan a natnag iti nasao a rangtay.
Maibasar pay iti report, immuna nga inwaragawag ni Coast Guard Rear Admiral Shannon Gilreath nga awan ti namnama a masarakan a sibibiag dagiti mapukpukaw a trabahador gapu iti nalamiis a danum ken kabayag ti oras manipud idi napukaw dagitoy.
Kinuna pay ni State Police Colonel Roland Butler nga agsubli dagiti otoridad iti danum para iti panakarekober ti bagi dagiti trabahador.
Awan met ti naduktalan dagiti otoridad a foul play ken maibilbilang nga aksidente ti nasao nga insidente.//Bombo Marinel Rodrigo
