BAGUIO CITY – Naipanamnama ti pannakaipaay ti insentibo kadagiti atleta manipod ditoy Baguio City a nakipaset iti 31st Sea Games sadiay Hanoi Vietnam
Iti interview ti Bombo Radyo Baguio ken City Administrator Engr. Bonifacio Dela Pena, adda iti maipapaay nga insentibo manipod iti lokal a gobierno ti syudad kadagiti amin nga atleta a makipaspaset kadagiti nagduduma a kumpetisyon iti sports malaksid laeng iti pammabigbig a maited-ited tunggal flag ceremonies
Nupay kasta, inlawlawagna a saanda a dagus a maipaay dagiti insentibo agsipod ta nasken pay a magna iti proseso ti pondo para iti daytoy
Kagiddan iti dayta, inpanamnama na pay iti ad-adda a pannakadevelop ken pannakapapintas kadagiti pasilidad iti syudad a mabalin nga aramaten dagiti atleta nga agsanay
Malaksid iti dayta, inkarina a sakbay a malpas iti agdama a tawen ket maaddaan ti syudad iti maysa kadagiti kapintasan a sports complex kasaruno iti panangikalikagumda a mangipalpas kadagiti proyekto para iti daytoy.
Maipalagip a dumanon iti 27 a medalya ti naiyawid dagiti atleta manipod iti Baguio City iti kaleppas a 2022 Southeast Asian Games sadiay Hanoi, Vietnam a pakairamanan daytoy ti lima a gold medals, 11 a silver, ken 11 a bronze medals.
