Nailista ti maysa nga insidente ti bullying idiay Bambang, Nueva Vizcaya kalpasan a naiwaras ti video ti sumagmamano nga agtutubo nga estudiante a linipak, ken induron ti kaeskuelaanna a babai iti uneg ti Bambang National High School.
Iti interview ti Bombo Radyo kenni Dr. Luviminda Cordero, dadaulo ti nasao a pagadalan, kinunana a naipaayaben dagiti estudiante a karaman iti insidente tapno dagos a marisut ti isyu ngem saan a nagparang dagiti dadduma kadakuada.
Sigun kenkuana, napasamak ti insidente idi Martes, July 8 iti Senior High School campus ken nakumpirmar a Grade 8 student ti karaman.
Maibasar iti inisial a report, mapapati a ti gapuanan ti insidente ket gapu iti “tsismis”, nu sadino mapapati nga inwaras ti biktima ti istoria, a nangitunda iti pannakakompronta ken panangdangran kenkuana dagiti kaklasena.
Gapu iti insidente, impaayab ti pagadalan ita nga aldaw dagiti nagannak dagiti karaman nga estudiante tapno maisayangkat ti panagsarita ken nasayaat a tungtungan.
Nainget a kinondenar ni Dr. Cordero ti napasamak a pannakadangran.
Impasiguradona pay a saanda nga ikankano ti insidente ken ipatungpalda ti maitutop nga aksyon maibasar iti agdama a pagannurotan ti pagadalan ken Department of Education.
