Naanayas ken balligi iti pannakaipatungpal ti inspection ken verification dagiti official ballots para iti siudad ti Baguio.
Iti pannakaiuman ti Bombo Radyo kenni Atty. John Paul Martin – Election Officer iti syudad ti Baguio, awan iti aberya wenno problema a naencounterda bayat iti inspection.
Impaganetgetna nga agpapada dagiti cover letter, sticker ken Project of Precints (POP).
Inlawlawagna a dagitoy ti nagbalin a basaran dagitoy gapu ta saan a mabalin a malukatan ti ballot box.
Malaksid iti dayta dagiti electoral boards laeng ti mabalin a manglukat kadagitoy.
Ti laeng naencounter dagitoy ket adda dagiti sumagmamano a saan nga agpapada nga stickers ngem inlawlawagna a ti napateg ket ti cover letter ken Project of Precints (POP).
Kabayatanna, kumpleto ken nakasaganan dagiti Automated Counting Machine (ACM), ngem dumalan laeng daytoy ti final testing karaman dagiti balota inton Mayo 7, 2025.
Ti inspection ket napasamak iti oras ti alas otso ket nagleppas daytoy iti agarup alas onse iti agsapa idi kalman.
Indaulwan met daytoy ni Atty. John Paul Martin- ti election officer iti Baguio iti presensya manipud iti Commision on Election, Treasury Office ken Baguio City Pollice Office personnels.
Kagiddan dayta, naisubli dagiti ballots iti silid a saan a maserrek ti siasinoman.
Nasilyadoan ti ruangan ken bantayan daytoy dagiti pulis.
Maipalagip a simmangpet dagiti official ballot boxes a maaramat para iti 2025 National, Local, ken BARMM Elections iti probinsya ti Benguet ken siyudad ti Baguio idi Abril a trenta iti agdama a tawen.
Iti immuna a panakiuman ti Bombo Radyo kenni Atty. Vanessa M. Roncal, ti Baguio-Benguet Election Supervisor ken Assistant Regional Director-CAR, nasurok 400 a ballot boxes ti simmangpet para iti probinsya ti Benguet ken 232 met a ballot boxes iti siyudad ti Baguio.//Bombo Noveh Organo
