BAGUIO CITY – Agtultuloy ti nainget a pananginspeksion ti Department of Tourism (DOT)-Cordillera kadagiti accommodation establishments kagiddan ti panaglukat ti turismo iti sumagmamano a paset ti rehion.
Iti interview ti Bombo Radyo Baguio, kinuna ni DOT-Cordillera regional director Jovy Ganongan a sakbay pay a naglukat ti turismo ti Baguio ket nakasaganan dagiti accommodation establishments, partikular ti nasurok 300 nga impaayanda ti accreditation.
Dinakamatna a babaen iti akreditasyon nga impaayda ket maipakita nga agtungtungpal ti maseknan a pasdek iti amin a health and safety protocols malaksid pay nga amin a tourism workers dagitoy ket fully vaccinated.
Innayonna nga addan dagiti pagalagadan nga impaulogda a sursuruten ita dagiti tour operators ken dagiti tour guides, pakairamanan dagiti pagalagadan a nasken a masurot iti mismo a tourism site.
Inyunay-unayna a napateg dagiti pagalagadan tapnu maipasigurado ti kinatalged ti amin nangruna ta adda paylaeng ti pandemya.
i
Imbingpay pay ni Ganongan a ti mapaspasamak ita ket revenge tourism wenno ti panagaliwaksay dagiti turista a nabayag a saan a rimrimwar kadagiti pagtaenganda gapu iti agdama a pandemya.
