BAGUIO CITY – Naituding a maisangpet ita nga aldaw wenno inton bigat ditoy siudad ti Baguio ti bangkay ti military intelligence officer a pimmusay iti panagsaneb wenno ambush sadiay Marawi City idi rabii ti Huwebes.
Nabigbig daytoy a ni Major Jerico Pasas Mangalus, naasawaan, tubo ti Pampanga ken residente iti Asin Road, Baguio City.
Maibasar iti report ti 103rd Infantry Brigade a nakabase sadiay Marawi City, nakalugan iti Crosswind SUV dagiti tallo nga operatiba ti Intelligence Service of the Armed Forces (ISAFP)-Military Intelligence Group 10 ken mangisayangkatda kuma iti intelligence operation idi sinaneb dagitoy dagiti mapapati a kameng ti Maute Group sadiay Barangay Lilod Madaya.
Nagpaut ti rinnupak dagitoy iti agarup 10 minutes a nangitunda iti dagus nga ipupusay da Major Mangalus ken Corporal Bryan Libot ken nakadangran ni Corporal Rolando Cartilla bayat a saan met a madetermina ti bilang dagiti pimmusay wenno nadangran iti kalaban.
Naiturong pay nga umuna ti bangkay dagiti dua iti headquarters ti Philippine Army sadiay Fort Bonifacio, Taguig City.
Naamuan a ni Major Mangalus ket kameng ti PMA “Banyuhay” Class of 2002, naikamang ti masya nga Igorota ken addaanda iti dua nga annak.
