BAGUIO CITY – Dandanin mapunno dagiti isolation facilities ti siudad ti Baguio gapu iti agtultuloy a panagngato ti kaso ti COVID-19 iti lokalidad.
Inwaragawag daytoy ni City Administrator Engr. Bonifacio Dela Peña kagiddan ti panangkunana a marisut ti nasao a pakaseknan iti kanito a mapababa ti kaso ken umado dagiti maimbagan manipud iti nasao a sakit.
Kinunana nga ita ket ad-adda a nangatngato ti mailislista nga aktibo a kaso ti COVID-19 no idilig kadagiti maim-imbagan ken makarkaruar kadagiti isolation facilities isut gapuna a mapumpunnon dagiti nasao a pasilidad.
Dinakamatna nga iti kaudian a panagwanawanda ket 79 a kama ti bakante iti Teacher’s Camp Isolation Unit bayat a pito laengen a kama ti bakante iti Baguio City Community Isolation Unit sadiay Santo Nino Hospital.
Innayon ni Engr. Dela Peña a kidkiddawenda metten ti tulong dagiti nagduduma a pribado nga indibidual ken grupo tapnu tumulong iti panakanayon isolation facilities.
Sigun pay kenkuana, nasken a malapdan ti panagngato ti kaso ti COVID-19 iti lokalidad nangruna ta adda ti limitasyon iti panakanayon dagiti bed capacities dagiti isolation centers ti siudad.
Kabayatanna, inaklon ni Engr. Dela Peña nga agkurkurang ita dagiti medical personnel a mangtaming wenno mangtaripato kadagiti pasyente ti COVID-19 ditoy siudad.
Impettengna a nabannog metten dagiti nasao a frontliners gapu iti kaadu dagiti kaso ti COVID-19 a mailislista ditoy siudad.
Dinakamatna a naiwaras metten ti dumanon 20 a nars nga inala ti lokal a gobyerno a tumulong kadagiti health workers.
Pagyamyamananna met ti pribado a sektor a nangipaay ti nagduduma a kagawaan a naiwaras kadagiti isolation facilities.
