BAGUIO CITY- Adadda nga inlawlawag ni Daryll Kim Longid, dadaulo ti Public Order & Safety Division (POSD) ti maipapan iti nagviral a video ti panangkemmeg dagiti sumagmamano a POSD personnel iti maysa a lalaki a menor de edad itay kanikadua idiay Central Business District ti Baguio City.
Sigun kenni Longid, maawatanda dagiti maaw-awatda a negatibo a komento gapu ta saanda a maawatan ti konteksto ti trabaho dagiti POSD personnel.
Innayon daytoy a saan a ‘trip-trip’ laeng ti panangkemmegda kadagiti illegal peddlers iti siudad.
Inlawlawag pay daytoy a kaadwan gamin kadagiti illegal peddlers, mangilatag kadagiti lakoda isu’t gapunna a ti pammay-anda, dagos a kumpiskarenda dagiti lako dagitoy sakbay pay a maigaman dagiti illegal peddlers dagitoy tapno maliklikan ti panag-ginginnuyod kadagiti lako.
Iti kaso ti nagviral a video ti nakemmeg a lalaki a menor de edad, inlawlawag ni Longid a namin-adduna a darasda a binagaan isu’t gapunna a ‘well aware’ ti nasao nga ubing nga ilegal ti araramidenna.
Nupay kasta, apaman a nasita dagitoy, dagosda metlaeng nga agsubli.
Sigun kenni Longid, iti kaso ti nasao nga ubbing, binagaandan daytoy a nu agsubli daytoy, kemmeganda daytoyen.
Inlawlawag pay ti nasao nga opisyal a paset ti nasao nga ubing iti maysa a grupo manipud lowlands. Innayonna a base iti obserbasyonda, ubbing dagiti maiba-baon nga agilako iti siudad ti Baguio no sadinno mabalin daytoy nga ikonsidera kas “child exploitation”.
Sigun kenni Longid, ‘organized ken syndicated’ pay kitdi ti pampamay-an dagitoy gapu ta awan ti awitenda nga IDs gapu ta ammo da a mangisaysayangkati Baguio City POSD iti profiling.
Inlawlawag met ni Longid a naiturn-overen ti nasao a menor de edad idiay Womens and Children Protection Desk idiay Patriotic tapno dumalan iti proseso ti pananglabsingna iti linteg kas minor. Impasiguradona pay nga adda daytoy iti natalged nga ima dagiti kapulisan ti siudad.
Mainaig iti dayta . .
Inlawlawag ni Longid a saanda a maala ti puso ti publiko nangnangruna nu maipanggep iti panagkemmeg kadagiti illegal peddlers iti siudad.
Nupay kasta, impeksana a maawatana daytoy gapu ta nakitana nga ada ti ‘hangover’ wenno madi pay laeng ti perception ti publiko iti opisinada gapu iti sistema ti nasao nga opisina iti maudi nga administrasyon no sadino sigun kenni Longid, awan ti nalawag nga operational system da ken awan ti suporta a naawatda manipud kadagiti nagduduma nga opisina tapno mangilawlawag ti trabahoda para kadakuada.
Gapu iti daytoy, impeksa ni Longid a maawatanna dagiti negatibo a komento kontra iti opisinada.
Nupay kasta, impettengna nga ituloyda latta ti mangkemmeg kadagiti illegal peddlers iti siudad gapu ta nu awan ti nasao nga opisina, nalabit agbalin nga ‘old Divisoria’ ti siudad gapu kadagiti illegal pedders. //bombokaren.c.sapirao
