Ammuyu kadi ka-Bombo nga adda ti maysa a Japanese a lalaki nga agtawen ti 25 ti naaddaan ti dakkel a bukol iti likud ti tenggedna gapu iti nabayag a panagdumog iti panagaramatna ti telepono?
Nakapasar isuna ti nakaro a sakit ti tengged, marigatan nga agtilmon, ken napartak a panaglukmeg agingga a saannan a maitag-ay ti ulona.
Sigun kadagiti Japanese doctor, sigud isuna nga aktibo ngem nagbalin nga “isolated” gapu iti “bullying.”
Gapu iti nabayag a panagdumog, naaddaan isuna ti bukol iti tengged ken nadadael dagiti tulangna.
Idi saan a simmayaat iti “collar,” naipasidong isuna iti operasion tapno matarimaan ti tenggedna usar ti tornilyo ken landok.
Innem a bulan kalpasan ti operasion, nabaelan ti pasiente nga ingato ken iggeman ti ulona.
Gapu iti napasamak, nagpakdaar ti doktor a ti sobra a panagaramat ti smartphone, nangruna kadagiti agtutubo, ket mabalin a mangitunda ti “dropped head syndrome,” maysa a naisangsangayan a kondision gapu iti nabayag a panagdumog ti tengged.
