![](https://img.bomboradyo.com/baguio/2019/12/brave-33.jpg)
BAGUIO CITY – Nangabak ti maysa kadagiti dua nga Igorot mix martial artists a naipasungalngal iti Brave 33 a naangay iti Prince Abdullah Al Faisal Stadium Sports Hall sadiay Jeddah, Saudi Arabia idi rabii.
Umuna a laban iti fight card ti panagsango da Harold Banario ken Gamzat Magomedov ti Russia iti bantamweight division.
Nupay kasta, naabak ni Banario kalpasan a nag-tap out daytoy.
Daytoy ti maikadua a laban ti 24-anyos a Team Lakay fighter iti Brave Combat Federation kalpasan ti a panag-debut-na iti event ti nasao nga MMA promotion ditoy Pilipinas idi March 15 a nang-abakanna kenni Ariel Oliveros.
Iggem ita ni Banario ti rekord a 5 wins, 2 loss bayat nga iggem ti 24-anyos a ni Magomedov ti rekord a 5 wins, 1 loss.
Kabayatanna, nakasango ti 23-anyos a ni Jeremy Pacatiw ti 25-anyos a ni Felipe Efrain ti Brazil iti catchweight division.
Nangabak ni Pacatiw babaen iti technical knockout kalpasan laeng ti 1 minute 10 seconds ti umuna a rikos ti labanda kenni Efrain.
Daytoy ti maikasangapulo a laban ti Team Lakay fighter iti Brave Combat Federation.
Iggem ita ni Pacatiw ti rekord a 10 wins, 4 losses bayat nga iggem ni Efrain ti rekord a 13 wins, 6 losses ken 1 No Contest.