Nagpakdaar ti maysa nga abogado a saan pay a panawen a maamyendaran ti Republic Act 9344 wenno Juvenile Justice and Welfare Act, a mangipababa iti minimum age iti criminal responsibility.
Iti pannakiuman iti Bombo Radyo kenni Atty. Edgar Avila, legal luminary ken sigud a Dean iti SLU College of Law, inisial a reakson laeng daytoy nangruna iti kaaduan iti napasamak a pammaltog a pakairamanan iti dua nga agtutubo iti maysa a pagadalan idiay Tacloban City, isut gapuna a masapul pay ti naun-uneg ken naannad a panagadal sakbay a mangaramid iti aniaman a panagbaliw iti linteg.
Nupay kasta, imbinglay ni Atty. Avila a maibasar iti agtultuloy nga imbestigasion, napilaanen iti kriminal a kaso ti kinse-anyos a menor de edad a maysa kadagiti suspek iti insidente.
Para iti abogado, adda iti “discernment” wenno naan-anay a pannakaawat ti suspek kas maibasar iti planoda a krimen iti uneg iti maysa a bulan ken ammuda dagiti ar-aramidenda.
Malaksid iti dayta, ammuda metlaeng a saanda a maibalud gapu iti nasao a linteg.
Maysa pay a makitkita ni Atty. Avila ket ti posible a rason iti insidente ket ti “exposure” dagiti agtutubo iti social media, a mabalin a maka-impluwensia iti panunot ken desision dagiti agtutubo.
Inlawlawagna a dagiti menor de edad a mapaneknekan a nakaaramid iti krimen ket maiturong iti rehabilitation center wenno youth facility para iti evaluation.
Impettengna a nu saan a maobserbaran ti panagsayaat ti ubbing uray kalpasan iti pannakasuspindir iti sentensia, mabalin a manggeddeng iti hues a serbian iti krimen seknan iti inaramidda.
Kabayatanna, mabalin met a maipila iti civil liability dagiti nagannak dagiti suspek tapno agbayad iti danyos kadagiti biktima ken pamiliada.| via Bombo Khey Reparip
