BAGUIO CITY- Inaklon ni Mayor Benjamin Magalong a kaadduan a probinsiya iti rehiyon Cordillera ket addaan iti nababa a contact tracing rate.
Patienna a resulta daytoy ti kinakurang dagiti contact tracer ken koordinasyon dagiti lokal a gobyerno iti daduma nga ahensiya.
Inlawlawagna a manipud iti 70% a contact tracers idi napalabas a tawen, naksayan daytoy iti 40% gapu iti kinakurang ti pundo.
Kinunana a saan a matutukan a nalaing ti contact tracing gapu ta maysa laeng a contact tracer ti mangtatrabaho iti dua wenno tallo a kaso ti COVID-19.
Gapu iti daytoy, nangipaay ni Mayor Magalong iti suhestiyon iti Department of Interior and Local and Government nga adalenda dagiti performance ti tunggal probinsiya tapnu mabigbig dagiti lokal a gobyerno nga agkasapulan iti tulong.
Nangipaay met iti suhestiyon kadagiti lokal a gobyerno a makikoordinarda iti Pulisya ken Bureau of Fire Protection iti masakupan dagitoy gaputa nakasagana dagitoy a tumulong iti contact tracing.
