BAGUIO CITY – Bimmaba ti pakabuklan a bilang dagiti krimen a napasamak iti rehion Cordillera iti entero a 2017.
Maibasar iti datus ti Police Regional Office – Cordillera, idi napalabas a tawen ket nasurok 8,000 ti pakabuklan a bilang dagiti nailistada a kaso a napasamak iti nagduduma a paset ti rehion.
Kinuna ti opisina a bimmaba iti 32 percent wenno 4,590 a kaso dagiti nailistada ita a tawen no idlig iti nasurok 12,000 a kaso a nairekord ti Cordillera PNP idi 2016.
Manipud iti nasao a datus ket bimmaba dagiti index crimes ti 58 percent wenno 2,318 nga insidente bayat a ti non-index crimes ken bimmaba metlaeng iti 25.32 percent wenno 2,272 nga insidente.
Impannakel met ti Cordillera PNP a ngimmato ti crime solution efficiency ti pulisya iti 12.6 percent idi napalabas a tawen.
Sigun iti pulisya, dakkel ti akem ti kampanya kontra iti iligal a droga iti panagbaba dagiti kaso a napaspasamak iti rehiyon Cordillera idi napalabas a tawen.
