Nalpasen a nangipila iti Certificate of Candidacy dagiti kaadwan kadagiti miembro iti Lakas CMD party iti probinsya iti Benguet.
Pakairamanan daytoy da Incumbent Congressman Eric Go-Yap a tumaray kas kongresista, Incumbent Governor Melchor Diclas kas gobernador, ken Marie Rose Fongwan-Kepes kas bise gobernador.
Dagiti met agtaray kas Sangguniang Panlalawigan Member iti District 1 ket pakairamanan da Johannes Amuasen, Lady Charmaine Molintas-Likigan,ken Alexander Fianza bayat a dagiti agtaray kas Sangguniang Panlalawigan Member iti District 2 ket pakairamanan da Romeo Salda, Ruben Tinda-an, ken Armando Lauro.
Malaksid kadakuada, adda pay ti dua(2) a manamnama a mangipila iti panagngayangayna kas miembro iti Sangguniang Panlalawigan iti District 2.
Kagiddan ti panangipila dagiti nadakamat a pulitiko iti panagngayangayda, imbinglay ni Incumbent Congressman Eric Go-Yap dagiti planoda para iti probinsya iti Benguet.
Karaman dita ti panakaituloy dagiti proyekto a narugyan kas iti panakaibangon iti Benguet Convention Center, Itogon Municipal Hall, ti Mankayan Public Market,ken ti panakairugi ti Pilando Bridge.
Innayon ti nasao a kongresista a maysa nga adbokasiyada ti panangpadur-as iti kabibiag dagiti umili iti probinsya iti Benguet.
Impanamnamana nga ipangrunada ti edukasyon, empleyo, ken agrikultura.
Kabayatanna, immuna metten a nagturong dagiti supporters dagitoy iti filing venue tapno ipakita ti suportada.//Bombo Jez Lapizar
