BAGUIO CITY – Pagparparikutan ita ti lokal a gobyerno ti Tuba, Benguet ti kaawan dagiti hauler a nakipaset iti bidding para iti panaka-akop dagiti basura dagitoy.
Sigun kenni Tuba Municipal Environment and Natural Resources Officer Engr. Sammy Paquit, uray pay ti agdama a garbage hauler dagitoy a ni Mark Anthony Camilo ket saan a nakipaset iti nasao a bidding.
Dinakamatna nga asidegen nga agpaso ti kontrata ti municipal government ti Tuba ken ti nasao a hauler.
Inaklonna met a saan a kabaelan ti munisipyo nga akupen dagiti basura dagiti umili sadiay tapnu maiturong sadiay Tarlac gaputa awan ti bukodda a garbage truck.
Nupay kasta, impaka-ammona nga panggep ti mayor dagitoy a gumatangda iti trak para iti nasao a pakaseknan ngem maipasidong pay iti kaskanen a proseso.
Naituding met nga agpapatangda kadagiti maseknan nga opisial tapnu mabukelda ti solosyon iti nasao a pakaseknan dagitoy.
