Naitaray iti ospital ti maysa a kadete ti Philippine National Police Academy (PNPA) gapu iti panagsaksakit ti tiyanna a maatap nga intunda ti hazing.
Binigbig ni PNPA Public Information Officer Lt. Col. Byron Allatog ti nasao a kadete a ni Cadet 4th Class John Desiderio.
Kinunana a nagreklamo ti kadete iti panagsakit iti tiyan idi agsapa ti Martes ken dagus met daytoy a naiturong iti dispensary ti PNPA.
Imbilin met ti doktor ti panakaiyakar ti kadete iti PNP Hospital sakbay iti East Avenue Hospital.
Kinuna ni Allatog a ti napasamak kenni Desiderio ket posible a kaso ti panagmaltrato ngem ur-urayenda paylaeng ti pormal nga statement ti kadete tapnu makumpirmar ti nasao nga atap.
Innayonna nga im-imbestigaranda paylaeng ti insidente tapnu maduktalan ti pudno a napasamak a nangitunda iti panaka-ospital ti nasao a kadete.
