Impablaak ti City Veterinary and Agriculture Office (CVAO) nga addan ti bukod a Kadiwa store ti siudad ti Baguio iti sidong ni City Veterinarian Dr. Silardo Bested kalpasan a nakompleton ti pannakaaramid ti agricultural trading facility a maawagan kas Kadiwa “Farmacy” a masarakan iti Slaughterhouse Compound, Baguio City.
Sigun kenni Supervising Agriculturist Marcelinan Tabelin, ti pasilidad ket opisial a mai-turn over kadagiti farmers association iti simple a seremonya a naituding inton Setiembre 26, bayat a ti opisial a panaglukat ti pasilidad iti publiko ket inton Setiembre 27.
Ni Mayor Benjamin Magalong ti nangibilin para iti pannakaipasdek ti pasilidad babaen ti panangpondo manipod iti Department of Agriculture.
Nangilatang pay ti departamento iti pondo para kadagiti asosasyon dagiti mannalon.
Ti mailako iti store ket direkta a maala manipod kadagiti lokal a mannalon.
Bayat ti turn-over program, iyuswat metlaeng ti City Veterinary and Agriculture Office ti Rice-for-All program nu sadinno, mabalin a makagatang ti government-subsidized rice commodity iti P35 tunggal kilo.
Agtultuloy met ti panangipatungpal ti P20 per kilo rice program para iti vulnerable sector babaen iti Dept. of Agriculture Cordillera (DA-CAR).
Dagiti dadduma pay a lako a mabalin a magatang iti pasilidad ket dagiti nateng, itlog, processed goods ken dadduma pay a produkto a taraon.
Gaputa direkta a naggapu dagitoy kadagiti mannalon, nababbaba ti presio ngem iti merkado.
