Nadiskobre dagiti garbage collectors ti kaipaspasngay a maladaga a nakakabil iti sako ken awanan biag iti pagbasuraan idiay Upper Rock Quarry, Baguio City itay agsapa, Hunyo 25.
Dagus met a naireport ti insidente iti Baguio City Police Office-Station 5 ken ti City Disaster Risk Reduction and Management Office – Operations Division.
Naberipikar a kaipaspasngay ti maladaga nga addaan iti umbilical cord ken agdagsen iti 2.5 ken 2.9 kilos ngem napukawan iti biag gapu iti blood pooling ken skin discoloration.
Iti social media post ti Public Information Office ti Baguio City, immapela ti City Social Welfare Office kadagiti nagannak nangruna dagiti inna nga uray aniaman ti pakaseknanda iti panagsikogda ket saanda koma nga agaramid iti dakkes a pakapukawan iti biag.
Manarimaan metten ti imbestigasion dagiti awtoridad tapno mabigbigbig ti kinasiasino ti nang-abandona iti maladaga.
Daytoy metten ti maikappat a kaso ti naabandona a maladaga iti siudad ti Baguio ita a tawen.
