BAGUIO CITY – Agtawen iti siyam a pulo ket maysa ti kalakayan a cavalier a dimmar-ay iti PMA Alumni Homecoming ita nga aldaw.
Nabigbig daytoy a ni Retired Major General Delfin Castro Sr. a miembro ti PMA class of 1951, tubo ti Norzagaray, Bulacan ken agnanaed ita sadiay Quezon City.
Naamuan a daytoy ti nagserbi a commanding general ti Southern Command sadiay Mindanao idi 1970s agingga idi 1980s.
Mabigbigbig pay daytoy a beterano ti Korean ken Vietnam war, ken ti klase dagitoy ti kaunaan a PMA class kalpasan ti maikadua a gubat sangalubongan.
Naamuan pay a namin-adun a naisarang daytoy iti peggad kas iti panakapaltog ti barukongna kabayatan ti panakirinnupakda kadagiti Hukbalahaps, ken ti panakatnag ti naglugananda nga eroplano sadiay Jolo, Sulu, ngem amin dagitoy ket nalasatan ti nasao a cavalier.
