ITOGON, BENGUET – Madama a bambantayan ita ti kameng ti gobyerno ti First Gate, Ucab, Itogon, Benguet gapu iti kimmaru a bettak iti kalsada.
Sigun kenni Mayor Bernard S. Waclin, naiyumanen daytoy iti Department of Public Works and Highways (DPWH) ken iti Benguet Corporation tapnu kitaenda nu enya ti kasayaatan a maaramid.
Mapatta-patta nga adda ti sigud a tunnel iti sirok ti kalsada nga isu ti rason nu apay a kimmaro ti bettak.
Iti agdama ket one lane passable ti nasao a kalsada ngem mabalballaagan latta dagiti biyaheros nga agannad.
Kabayatanna passable met ti kalsada idiay Midas, Poblacion, Virac, ken daduma pay a barangay idiay Itogon.
Sigun pay kenni Waclin adda ti sumagmamano a naireport a landslide kadagiti residentials ngem saan unay a grabe ti kasasaadna.
Nakuna pay ti Mayor nga adda ti dua a pamilya idiay Gumatdang, Itogon, Benguet a nagbakwit.
Impalagip ngarud ni Waclin nga agannad dagiti umili nangruna dagiti adda iti igid ti karayan wennu asideg iti dam.
Binallaagan met ti Mayor dagiti minero ken agkwarkwari a saanda nga ipilit ti sumrek iti trabahoda tapnu maliklikan ti disgrasiya.
