Nangiyuswat iti baro a “crackdown” ni Baguio Mayor Benjamin Magalong kontra kadagiti indibidual ken establisimiento a mangibelbelleng iti basura ken narugit a danum kadagiti karayan ken pagayusan iti danum iti siudad.
Nadutukan ti CEPMO, Public Order and Safety Division, ken pulisia a paingten ti panagbantay ken tiliwen dagiti aglablabsing.
Nainget metlaeng a maipatungpal ti “one-strike policy” nu sadinno dagos a mapatawan iti notice of violation dagiti matiliw, nga addaan iti multa P5,000 ken kasapulan a mangisayangkat iti tignay iti uneg laeng iti tallo nga aldaw.
Mabalin metlaeng a mapilaan iti kaso dagiti naglabsing.
Paset daytoy iti kampania nga “Oplan Karayan” tapno masalakniban dagiti karayan iti uneg iti siudad kontra iti polusion.
Pinalagipan ni Mayor Magalong a ti iligal a panangibelleng iti basura ken wastewater ket panaglabsing iti Environment Code ken Clean Water Act, ken kinidawna nga agbaliw ti amin para iti masakbayan iti sumaruno a henerasion.
