BAGUIO CITY – Agingga ita ket saan paylaeng a nabigbig ti kameng ti New Peoples Army a napapatay iti engkwentro sadiay Balbalasang, Balbalan, Kalinga idi kanikadwa.
Iti ekslusibo a panakiuman ti Bombo Radyo kenni Col. Leopoldo Imbang Jr., commander ti 503rd Infantry Bridage, kinunana nga adda paylaeng sadiay Balbalasang ti nasao a bangkay ken kalpasan ti tallo nga aldaw nga awan ti mangala iti bangkay ket maitabonen daytoy.
Malaksid iti daytoy, kinunana nga adda ti nakitada a tallo a kameng ti NPA a limmagto iti rangkis ngem saanda pay a naammoan no pimmusay dagitoy wenno saan.
Impanamnamana met a natalgeden ti kasasaad ti soldado a napltogan ti sakana.
Kinunana nga iti agdama ket adda daytoy iti pagagasan tapnu maipanamnama metlaeng a saan a naimpeksyon ti tama daytoy.
Maipalagip a naaddaan iti rinnupak dagiti kameng ti 50th Infantry Battalion ken kadagiti NPA iti nasao a lugar iti las-ud ti tallopulo a minutos.
Kalpasan ti engkwentro ket narekober ti maysa nga M16 rifle, dua nga M16 magazines, duapulo nga rds cap ken uppat a pulo ket innem nga M16 cartridges.
Patien met ni Col. Imbang a ti grupo ni “Ka Abraham” a nakabase sadiay Abra wenno ti grupo ni “Ka Giwa” a nakabase sadiay Kalinga ti nakarinnupak dagitoy.
