Impakaamo ti maysa nga opisial ti PNP-Bokod a “closed coordination” ti opisinada iti Municipal Disaster Risk Reduction and Management Office (MDRRMO) iti aniaman nga insidente a mapasamak idiay Bokod, Benguet.
Kasaruno ti vehicular accident idiay Sitio Jappas, Brgy. Bobok-Bisal, Bokod, Benguet a nakatayan ti dua nga indibidual idi Hunio 30, 2025.
Iti interview ti Bombo Radyo kenni Police Captain Juliet Kaniteng, Officer-in-Charge ti Philippine National Police-Bokod, kinunana a nakasaganada ng agresponde iti aniaman a saan a mapakpakadaan nga insidente iti nasao a lugar.
Kinunana pay nga inaldawda a mangipablaak iti social media page nu ania ti weather ken road condition iti lugarda tapno maipaayan ti impormasion dagiti residente iti lugar ken dagiti passersby.
Sigun kenni Kaniteng, mabalin nga umawag dagiti residente wenno passersby iti numero a 09563326188 wenno 09985987783 iti kanito nga adda ti mapasamak nga insidente wenno emerhensia tapno dagosda nga aggaraw.
Kabayatanna, dumanon iti uppat a pulo ket walo ti bilang dagiti personnel iti PNP-Bokod.