BAGUIO CITY – Simmuko iti tropa ti gobyerno ti maysa a kameng ti rebelde a New People’s Army sadiay Luna, Apayao.
Insukona metlaeng ti maysa a M653 carbine riffle, tallo a magazines ti paltog, adu a bala ken maysa a homemade a pagkabilan ti bala.
Pinasangbay daytoy dagiti opisyales ti Philippine Army, Apayao Police Provincial Office ken ti provincial government ti Apayao iti seremonya a naangay sadiay Payanan, San Gregorio, Luna, Apayao.
Dagus a naiturong ti sigud a rebelde iti opisina ti Philippine Army sadiay Alcala, Cagayan para iti custodial debriefing ken umno a disposisyon.
Sigun iti militar, ti nasao a rebel returnee ket maikonkonsidera a child warrior gaputa iti tawenna a sangapulo ket naguyugoy daytoy a kumappeng iti NPA nga addaan operasyon iti Cagayan ken Apayao.
Impeksana met ti panagyamanna iti militar iti panangisakad dagitoy iti panagsukona ken impeksana pay ti inanamana a maawat daytoy iti kagimongan babaen iti suporta ti gobyerno ken dadduma sektor iti komunidad.
