PARIS, France – Naggigiddan a naguni dagiti kampana ti Notre Dame sadiay Paris idi Biernes iti umuna a gundaway sipud idi napasamak ti uram idi 2019 a nangdadael iti simbaan.
Ti panaguni ti walo a kampana ti amianan a paset ti Notre Dame ket makabulan sakbay a naglukat manen ti simbaan kalpasan ti lima a tawen a “restoration.”
“This is a beautiful, important and symbolic step,” sigun kenni Philippe Jost, a maysa kadagiti nadutukan a mangisimpa iti simbaan.
Maipalagip nga idi rabii ti Abril 19, 2019, nauram ti “historic cathedral” bayat a buybuyaen dagiti sumagmamano nga umili ti Paris.
Gapu iti napasamak, dagos nga imbilin ni President Emmanuel Macron ti pannakaibangon manen ken pannakaisimpa ti Notre Dame iti uneg ti lima a tawen ken aramidenda a napinpintas ngem iti sigud a langa daytoy.
Agarup 250 a kompania ken ginasgasut nga eksperto ti nagurnong para iti pannakaisubli ti nasao a pasdek nu sadinno dumanon iti ginasgasut a milion a euro ti nabusbos.
