Mapapati a ti kampananya ni dismissed Bamban, Tarlac mayor Alice Guo bayat ti 2022 eleksion ket inyurnos ti “Chinese state security.”
Daytoy ti kaudian nga alegasion nga imbutaktak ni Wang Fu Gui, ti gayyem ken sigud a “cellmate” ti mangibagbaga a Chinese spy iti dokumentario ti Al Jazeera, a ni She Zhijiang, maibusor kenni Guo.
Sigun kenni She Zhijiang iti dokumentario, ni Guo ket ahente ti Chinese ministry of state security, ken naminsan a kiniddawna kenkuana ti pondo para ti panagkampania daytoy.
Nabaelan met a nakapatang iti opisina ni Senate Deputy Minority Leader Risa Hontiveros ni Wang Fu Gui babaen ti video teleconferencing, ken naipabuya ita nga aldaw ti nairekord a video bayat ti agtultuloy a panangimbestigar ti Senado seknan iti iligal a POGO.
Sigun kenni Wang, ni Guo Hua Ping ket espia ngem saan nga espesial a kas iti dadduma.
Kinunana a ti peke a kinasiasino ni Guo Hua Ping ket sekreto laeng.
Idi nadamag ni Wang seknan iti mapapati nga “assignment” ni Guo kas Chinese spy, kinunana a rumbeng a madamag daytoy a direkta kenni She Zhijiang.
Inayon pay ni Wang nga adda ti “correlation” ti POGO wenno scamming businesses kadagiti spying operations.
Kalpasan ti pannakairuar ti interview ti Al Jazeera, kinuna ni Wang a ni She ket naipadamag a “severely suppressed” babaen ti gobierno ti Tsina gapu ti panangibutaktakna ti kaso ti panagespia a nakairamanan ni Guo.
Kabayatanna, numan pay nakipaset ni Guo iti panagdinggeg ken naipakita kenkuana ti interview kenni Wang, saanna paylaeng a sinungbatan ti alegasion kontra kenkuana.
Nagkiddaw met ti opisina ni Hontiveros iti embahada ti Pilipinas idiay Thailand a makapatang ni She ngem saan a napatgan gapu iti diplomasia a rason.
Immunan nga impakaamo ti kampo ni Guo ti posibilidad a panangipilada ti kaso kontra iti international news channel a naipatangatang a dokumentario.
