Sinmango ti kampo ni sigud a President Rodrigo Duterte iti International Criminal Court (ICC) tapno iyebkasda ti panangkontrada iti kiddaw ti prosekusyon a tingitigen dagiti banbanag a nakumpiska kabayatan iti panagaresto iti sigud a presidente.
Sigun iti depensa, maysa daytoy a ‘fishing expedition’ wenno wagas tapno mangbirok iti ebidensya nga awan ti umdas a basaran.
Kinuwestionaran met ni lead defense counsel Atty. Peter Haynes nu apay a tatta laeng a kayat a tingitingen ti prosekusyon dagiti kagawaan nupay nabayagen nga adda daytoy iti kustodiya ti International Criminal Registry.
Sigun pay kadakuada, awan ti nalawag a koneksyon na daytoy iti kaso a sangsangwen ti sigud a presidente.
Gapu iti daytoy, kiniddaw ti depensa iti International Criminal Court Trial Chamber III a maituding ti Hunyo 30 kas maudi nga aldaw iti anyaman a mosyon ti prosekusyon seknan kadagiti ebidensya nga adda iti International Criminal Court Registry.
Panggep ti kampo ni Duterte a liklikan ti anyaman a kanayunan a pannakaitantan dagiti panagsagana para iti umadani a panagdengngeg. //bombokaren.c.sapirao
