Kinarit ni House prosecutor Terry Ridon ti Bicol Saro Partylist ti depensa nga ilawlawagda no siasino ti nakaawat iti pondo no saan a pudno a tattao dagiti indibidual a kas kada Mary Grace Piattos, Milky Secuya, ken dadduma pay.
Daytoy ket mainaig iti P612.5 million a confidential funds a naituding a mapagsasaritaan iti impeachment trial kontra kenni Vice President Sara Duterte.
Sigun ken ni Ridon, maatap a napartuat laeng ti nagan a kas iti Piattos, Secuya, nangruna ket awan ti birth record-da iti Philippine Statistics Authority (PSA).
Impetteng ni Ridon a dagiti nasao a peke a nagan ket sentro ti isyu maipapan iti confidential funds.
“Pag-uusapan po roon ‘yung Mary Grace Piattos, kung sino si Mary Grace Piattos, totoong tao ba si Mary Grace Piattos? Kung hindi totoong tao si Mary Grace Piattos, sino ‘yung kumuha ng pera na pinirmahan ni Mary Grace Piattos?” sigun kenni Ridon iti maysa a News Forum sadiay Quezon City idi Sabado.
Innayon ti opisial a naituding a mangidatag ti prosekusion iti ebidensia mainaig iti maatap a saan nga umno a pannakaaramat ti confidential funds.
