Nagpalagip manen ni Johnny Dogao ti Brgy. Captain sadiay Camp 6 Tuba, Benguet, kadagiti byaheros a kanayon latta nga agannad iti kanito nga agbyaheda nangruna iti Kennod Road kasaruno dagiti aksidente a napasamak.
Iti exclusive interview ti Bombo Radyo kenkuana,kinuna a kasapulan a sukimaten a nalaing dagiti byaheros dagiti luganda sakbay dagitoy nga agbyahe.
Malaksid iti dayta, ket ti panangikondisyon a nasayaat iti bukod a bagi tapno maliklikan ti aksidente.
Nagpalagip daytoy kasaruno ti napasamak nga aksidente a pannakatnag ti maysa a lugan a nakatayan dagiti dua nga indibidual sadiay Sitio Maramal Barangay Camp 4, Tuba, Benguet itay laeng kanikadua.
Kinunana pay nga adda latta dagiti agtentennag a batbato rason a kasapulan a talaga ti panagannad kasta metten nga ikontrol ti panagpataray iti lugan agsipud ta delikado ti nasao a kalsada ken pakurba pay daytoy.
