Kidkiddawen dagiti sumagmamano a driver ti kanayonan a pamasahe dagiti commuters kadagiti jeepney iti siudad ti Baguio kagiddan ti possible a panagngato ti presyo ti petrolyo inton sumaruno a lawas.
Iti pannakiuman ti Bombo Radyo kenni “Nick”, kinunana nga iti innem a tawen a panagpaspasadana ket nairwam daytoyen a kanayon ti panagngato ti petrolyo.
Sigun kenkuana, inan-anusanna daytoy tapno laeng adda ti pagtrabahuanna.
Kinunana nga iti tunggal aldaw a panagpasada dagitoy ket dumanon iti nasurok P1,000 ti mabusbus dagitoy pangkrudo.
Gapu iti dayta, kiddawna a mapatgan ti kiddawn a ngumato ti pamasahe iti P3 agingga P5.
Nupay kasta, saanna a namnamaen a mapasamak daytoy gapu iti nabuntog a pannakaaprobar manipud iti Land Transportation Franchising and Regulatory Board.
Malaksid iti dayta, kalikagumna metlaeng a maingato ti pamasahe tapno ngumato met dagiti mabirukan dagitoy nangruna ta adu dagiti saan nga agbaybayad iti pamasahena.
Kabayatanna, namnamaen metlaeng da “Novets ken Ariel ” a mapatgan ti nasao a kiddaw, nangruna ta adda metlaeng pamilya dagitoy a bibiagen.
Malaksid iti dayta, kwekwestiunarenda metlaeng ti dakkel a deperensya ti presyo ti petrolyo iti siudad ti Baguio no idilig iti Lowland areas wenno iti kabangibang a probinsya kas sadiay Abatan, Benguet.
Sigun kadakuada agarup P10 ti deperensyana no sadino daytoy metlaeng ti masya kadagiti parikut dagiti driver iti siudad.//Bombo Noveh Organo
